Elektronisk dansemusikk på nynorsk - Fyrste singel av Rotevatn remixed kjem i dag!

LYTT HER

Andreas Rotevatn slapp sitt fyrste soloalbum - "Av daude gror" - like før sommaren. No har space disco-ringreven Prins Thomas, som saman med DJ-en Isoebel dannar duoen Double Trouble, laga ein remix av låta “Berre kom heim” som er ute i dag!

Låta er ein siste smak av sommar, og er duoen si fyrste utgjeving. 

"Av daude gror" hausta gode kritikkar - mellom anna skreiv Audun Vinger i DN at det var “catchy, følsomme og intrikate låtar” på “inderlig, ærlig og frekk norsk”; I nettavisen trilla Tor Hammerø 5-ar, og påpeika at albumet “groover og svetter uten stans”!

Det er nettopp fokuset på groove og det dansbare som gjorde at Rotevatn tok kontakt med Prins Thomas om å lage ein remix. “Eg er jo ikkje var framand for å leite fram ein og anna trommemaskin eller analog synth i studio, og eg har heilt klart henta mykje inspirasjon frå klubbmusikk og elektronika i låtskrivinga mi” seier Andreas. “Derfor kjennast det so riktig at Double Trouble tok låtane endå eit steg nærmare dansegolvet med sin remix!”

Andreas Rotevatn (f.1989) er på mange måtar ein kløyvd artist, som jamvel stend stødig i det todelte. 

På den eine sida har han ein bygdeoppvekst på Nordfjordeid, og på den andre over 10 år som kunstnar i storbyen. Rotevatn nærer ein kjærleik for bruksmusikk og det dansbare, trass i ei omfattande utdanning på fleire eliteskular for musikk. Han er ein spellemannsnominert og prisvinnande komponist, som jamvel òg har brei apell og gode strøymetal. Rotevatn er tekstleg inspirert av fortida, gjennom Håvamål, Ivar Aasen og Bibelen, men samstundes vert han inspirert av moderne og lydar frå synthar og trommemaskiner. Det akustiske og improviserte, møter det elektriske og planlagde. Einkvan stad i midten, i symbiosa, der trivast Rotevatn best! 

Prins Thomas har jobba som produsent, DJ og remixer i fleire tiår, er spellemannsnominert fleire gongar og har millionar av strøymingar på Spotify. Han var ein av grunnleggarane bak Oslo-discoen, eller space-discoen, som fekk undergrunnen til å koke på tidleg 2000-tal. Saman med Hans-Peter Lindstrøm og Todd Terje blanda dei saman discorytmer, nyare trommemaskiner, eldre synthar og effekter, i ei herleg eklektisk elektroakustisk dansbar blanding.

Isoebel frå Kolbotn, er eit nytt namn på Dj-scena i Oslo. Ho har frekventert klubb-scena i Oslo i lengre tid, og har nyleg teke steget inn i DJ-boothen. Prins Thomas tok Isoebel under vengene, og saman dannar dei altso duoen Double Trouble, som er her med si første utgjeving.