Mange synest dei bruker for mykje tid på skjerm

Medietilsynet har spurt om folks forhold til eigen skjermbruk i samband med ei ny undersøking om kritisk medieforståing i befolkninga. Kvinner svarer i noko større grad enn menn at dei bruker for mykje tid på skjerm, mens dei eldste i langt mindre grad enn dei yngre meiner dei har for mykje skjermtid.

– I dag treng dei fleste av oss å bruke nettet til mange ulike daglege gjeremål, både i jobb og fritid. Svara i undersøkinga tyder likevel på at mange opplever at skjermen tar for mykje tid i kvardagen, seier direktør Mari Velsand i Medietilsynet.

Mange som gjer noko for å redusere skjermbruken, opplever at det verkar

59 prosent av respondentane i undersøkinga svarer at dei har gjort noko for å få ned skjermtida.

Heile 72 prosent av dei som har gjort ein innsats for å få ned skjermbruken, opplevde at det fungerte. Mange av dei svarer at dei har tatt enkle grep som å legge frå seg telefonen i staden for å ha han i lomma (38 prosent) og slette appar eller spel på telefonen (37 prosent). Vel ti prosent har sletta ein eller fleire profilar på sosiale medium og nesten like mange har sagt opp abonnement på strøymetenester. Nokre få, to prosent, seier at dei har bytt ut smarttelefonen med ein enklare variant, som berre kan brukast til å ringe og sende tekstmeldingar med.

– Svara viser at bevisstheit rundt eigen skjermbruk kan redusere tidsbruken, seier Velsand.

Du finn delrapporten her.

Også mange barn meiner at dei bruker for mykje tid på mobilen

Mens spørsmåla til dei vaksne gjaldt all type skjermbruk, har Medietilsynet spurt barn og unge spesifikt om deira mobilbruk. Nesten éin av tre 9-18-åringar svarte at dei bruker for mykje tid på mobilen, ifølge undersøkinga Barn og medium 2024. Dette gjeld jenter i større grad enn gutar, og eldre barn i større grad enn dei yngre.

37 prosent av barn og unge som bruker sosiale medium meiner at dei bruker for mykje tid på desse tenestene, og 28 prosent skulle ønske at dei klarte å logge av sosiale medium oftare.

Dette kan du lese meir om her.

Les og ungdommanes eigne tips for å kutte skjermtid i ei sak frå Medietilsynet i fjor.

Medietilsynet publiserer rapportane "Kritisk medieforståelse i den norske befolkningen” og  “Barn og medier” i løpet av hausten. 

Fakta om skjermbruk frå undersøkinga:

• To av tre meiner at dei bruker for mykje tid på skjerm.
• 59 prosent har gjort noko for å få ned skjermbruken sin.
• Av dei som har gjort aktive grep for å redusere skjermtida, meiner 72 prosent at det har fungert. 
• Respondentane er positive til sosiale medium som arena for å gi kunnskap om kva som skjer i samfunnet, moglegheita for å møte nye menneske og relasjonen til venner.
• Respondentane er meir negative til sosiale mediums påverking på sjølvkjensla og søvnen deira. 
  Kvinner og den yngste aldersgruppa meiner i langt større grad enn menn og eldre at sosiale medium har negative konsekvensar for sjølvkjensla og søvnen deira.