Stengjer Mannheller ferjekai natt til 26. september

– Det er ein heilt vanleg slitasjeskade på ein heisebjelke som lyfter brua opp og ned, og difor må vi erstatta bjelken, seier byggjeleiar Kim Dagsland i Statens vegvesen.

Arbeidet skulle eigentleg gjennomførast natt til 20.august, men måtte utsetjast på grunn av vind.

Slik blir ferjetidene i samband med arbeidet

Siste avgang frå Mannheller før arbeida startar blir klokka 23:30, medan siste avgang frå Fodnes blir 23:50. 

Fyrste avgang frå Mannheller etter arbeida er klokka 05:20. Fyrste frå Fodnes er klokka 05:40.

Medan Mannheller ferjekai er stengd, vil det kun vere forbindelse mellom Lærdal og Kaupanger. For oppdaterte rutetider, sjå Norled sin rutetabell.

– Vi gjer det for trafikantane

Statens vegvesen har forståing for at stengd ferjekai kan vera krevjande for trafikantane.

– Men då er det viktig å minna om at vi gjer dette nettopp for dei. Vi har lagt arbeidet til den tida av døgnet då det er minst trafikk, for å minimera ulempene for trafikantane, legg Dagsland til.

Dette er drift og vedlikehald

Statens vegvesen har ansvaret for drift og vedlikehald av 10.600 km riks- og europaveg over heile landet, inkludert 16 ferjestrekningar.

Drift er å halda vegen open i dag, vedlikehald er å syta for at vi klarar det i morgon. Og det å erstatta ein heisebjelke på ein ferjekai, er ein del av dette.