Áigut dekoloniseret Árktisa historjjá dán jagáš Riddu Riđus

Dán jagi  festiválavuosáhus Riddu Riđus áigu Árktisa govaid bakte muitalit ja guorahallat luottaid mat gávdnojit eamiálbmogiid biográfain, kultuvrrain ja vuosehemiin sullii 1750-logu rájes gitta 1930-logu rádjái daid deaivvademiid birra mat dáhpáhuvve koloniija aktevrraiguin. Dáiddavuosehussii gullet govat mat čatnašuvvet muitalusaide Sámis, Kalaalit Nunaatas (Ruonáeatnamis), Alaskas ja Davvi-Kanadas. Dáiddavuosehus guorahallá govt historjjálaš govaid sáhttá váldit ruovttoluotta ja vejolaččat riggodahttit  árktalaš álbmogiid iežaset muitalusaid / máidnasiid. Dán barggu olis galget koloniijafámuid iežaset muitalusat dekoloniserejuvvot.

Festiválahoavda Sajje Solbakk illuda dán jagáš festiválavuosehussii:  

-Dát lea buot eanemus fátmmasteaddji dáiddavuosehus Riddu Riđu badjel 30-jahkásaš festiválahistorjjás! Vuosehusa duohken lea vihtta jagi arkiivvaid guorahallan ja ovttasbargu gaskal oarjemáilmmi- ja eamiálbmotdutkiid. Mus gal juo čoalit čagalduvvet go jurddašan ahte mii fargga beassat juogadit dáid erenoamáš muitalusaid olles máilmmiin.

Vuosehusas ožžot festiválaguossit oahpásmuvvat ee. sámi dáiddáriid Outi Pieski, Anders Sunna, Raisa Porsangera, Áillohačča/Nils Aslak Valkeapää (1943-2001) ja Aage Gaupa (1943-2021) dáiddadujiide, ja maid ruonáeatnanlaš dáiddárii Bolatta Silis-Høegh’ii ja Sugpiat Antropolii, ja vel kuráhtor ja dáiddár  Sven Haakansonii.

Dáiddavuosehus lea ovttasbargu Arctic Voices-prošeavttain. Prošeakta lea joavku, masa gullet riikkaidgaskasaš  dutkit ja dáiddárat geat oassálastet bargui dekoloniseret  dan árktalaš historjjá mii dál dominere. Prošeakta čoaggá muitalusaid mat čujuhit sidjiide geat ledje imperialismma vuostáiváldit nu daddjon viiddiduvvon ovccinuppelogát čuohtejagis.

Festiválavuosehusa čuovvola beaivválaš gaskkustanprográmma, masa festiválaguossit sáhttet oassálastit, nugo omd. ságastallamat Anders Sunnain, Raisa Porsangeriin ja Bolatta Silis-Høegh’iin, ja vel vuollanbádji Sven Haakansoniin.

Dáiddavuosehusa rahpan lea gaskavahku, suoidnemánu 10. beaivvi dii. 18.00. Rabasáiggit muđuid leat duorastagas lávvordahkii 10.00 – 18.00, ja sotnabeaivvi 10.00 – 14.00.