Drop-in-dåp: 150 born og vaksne døypt

Den siste tida har 150 personar blitt døypt i ein drop-in-dåp i Den norske kyrkja. Det viser ei oppteljing som Kyrkjerådet har gjort.

I Kolbotn kyrkje i Nordre Follo vart ein 85-åring døypt. Les meir her.

Den norske kyrkja har i mai og i inngangen til juni hatt ei felles periode med drop-in-dåp. I denne perioden har det vore over 34 høve til å bli døypt i ein heilt enkel seremoni.

– I dåpen får vi løftet om at Jesus er med oss alle våre dagar, seier kyrkjerådsleiar Harald Hegstad.

– Dåpen er ei kjærleikserklæring frå Gud til alle som vil bli døypt. Det er ei heilag handling der Gud tek imot oss, og gjev rom for ei ny byrjing, uansett alder.

Ynskjer fleksibilitet

Med eit ope kyrkjerom og ein fastsett dato, har drop-in-seremoniane blitt varmt teke i mot av Den norske kyrkja sine medlemmer.

Ulike undersøkingar som Kyrkjerådet har gjort, viser at mange av kyrkja sine medlemmer etterlyser fleksibilitet og lågare tersklar på kyrkjelege handlingar som dåp og bryllaup.

– Mange set pris på fleksibiliteten og det enkle i ein drop-in-dåp, samtidig som dei opplever det som høgtideleg og meiningsfullt å bli døypt. Dåpen gjev tilhøyrsle til det store fellesskapet i kyrkja, seier kyrkjerådsleiaren.