Rasteplassen Liasanden langs Nasjonal turistveg Sognefjellet opnar på ny – no oppgradert for syklistar og andre mjuke trafikantar.

Den rolege, lune rasteplassen i skogen ved Liasand var den første rasteplassen som sto ferdig langs dei nasjonale turistvegane i 1997. Etter 27 år med mange besøkande og mykje trafikk var Liasanden betydeleg nedsliten med skadar på røter og undervegetasjon, og derfor klar for eit løft.

Den oppgraderte rasteplassen har fått nye benkar i tre, og to skur med tak som gir ly for ver og vind; noko som har vore eit tilbakevendande ynskje frå syklistar. Dei opphavlege arkitektteikna toaletta frå 1997 blir ståande oppgraderte som eit tidsminne. Som eit miljøvenleg tiltak har Statens vegvesen stengt skogen for bilkøyring og viser til felles parkering i aust: Derifrå kan dei reisande lett spasere inn i rekreasjonsområdet.

Nyetablert vegetasjon vil framleis kunne vera sårbar for tråkk, så noko avsperring kan vere aktuelt ut sesongen.

Torsdag 27. juni kl. 12.00 gjenopnar Statens vegvesen Liasanden rasteplass. Slik blir opningsprogrammet:

•             Musikkinnslag v/gruppa «4 Sølvsupre Menn»

•             Velkomen v/Per Ritzler, Statens vegvesen

•             Arkitekturen v/Torun Golberg, Jensen & Skodvin

•             Ordførar Kristian Frisvold, Lom kommune

•             Silje Myhre Amundsen, Statens vegvesen

•             Mari Arnøygard Wedum, Visit Jotunheimen

•             Opning v/samferdselsminister Jon-Ivar Nygård

•             Servering v/Lom Bygdekvinnelag

Arkitekt: Jensen & Skodvin

Entreprenør: Mesta

Byggherre: Statens vegvesen

 

Gjennom 30 år har Statens vegvesen tilrettelagt atten utvalde naturskjønne strekningar langs fjell, foss, kyst og fjord. Nyskapande arkitektur i form av rasteplassar, utsiktsramper og servicebygg, saman med tankevekkjande kunst inspirerer og begeistrar vegfarande frå både inn- og utland. Tilrettelegginga av attraksjonen Nasjonale turistvegar bidrar til verdiskaping i reiselivsnæringa i tråd med hensikta med satsinga.