Skal revidere gravferdsliturgien i kyrkja

Gravferdsliturgien gir rammene for ein gravferdsseremoni i kyrkja: Tekstar, salmar, minneord og talar – og rekkefølgja på desse. No har Kyrkjerådet sett i gang ein prosess med å gå gjennom og revidere liturgien. Noverande liturgi er frå 2002.

– Ein gravferdsseremoni skal romme eit spekter av kjensler og livserfaringar: sorg, glede, sinne, takksemd og håp, seier kyrkjerådsleiar Kristin Gunleiksrud Raaum.

– Vi set i gang arbeidet med å revidere gravferdsliturgien med bakgrunn i fersk forsking, spørjeundersøkingar og tilbakemeldingar frå tilsette, deltakarar og andre aktørar. Både samfunnet og kyrkja har endra seg dei siste 20 åra, og no er det på tide å vurdere endringar i gravferdsliturgien.

Prosessen for å revidere gravferdsliturgi er ein grundig og involverande prosess, der både fagmiljø, biskopar, kyrkjemusikarar, folkevalde og alle som ynskjer, skal kunne bidra. 

Les bakgrunnen for igangsetjinga i sakspapiret her.