-Det er gode nyheiter at ingen omkom i trafikken i Vestfold og Telemark i oktober, men 111 for heile landet i 2023 er altfor mange. Statens vegvesen jobbar hardt med å redusere talet på omkomne i trafikken og vi har ingen å miste, fortel Vibeke Lin Jacobsen i Statens vegvesen.

Fire personar har omkome i trafikken i Vestfold og Telemark hittil i år. To av ulykkene var på MC og to i personbil.

I heile landet omkom 15 personar i trafikken i oktober. Dette er nesten tre gonger så mange som i fjor, då seks døydde. Det er over ti år sidan vi sist hadde så mange trafikkdrepte i oktober. Så langt i år er 111 drept i trafikken. Det er 16 fleire enn på same tid i fjor.

Tolv av dødsulykkene i år er ulykker med to eller tre omkomne. Det er 16 fleire dødsulykker mellom møtande bilar i år enn i 2022. Møteulykker og utforkøyringsulykker dominerer årets dødsulykker på vegane. 50 mista livet i møteulykker, og 37 omkom i utforkøyringar.

81 menn og 30 kvinner omkom i trafikken dei ti første månedane av året. Fleire enn halvparten (60) døydde i personbil. Dette er ein auke på 14 frå i fjor. I 34 av ulykkene var tungbil involvert, og fem av dei omkomne var førarar av desse bilane.

Vær synleg og bruk refleks

-Nå som vi er inne i den mørke årstida vil vi minne om kor viktig det er å bruke refleks. Utan refleks vil du først bli oppdaga på 25-30 meters hald. Med refleks er du synleg på 140 meters avstand, sjøl om bilen berre har nærlys på. Med fjernlys aukar synlegheita til 400 meter.

Ein refleks gir sjåføren heile ti sekund til å køyre trafikksikkert forbi deg, så gjer deg synleg og bruk refleks, oppfordrar Jacobsen til slutt.