Posisjonskonferansen 2023

Har vi nok kunnskap og kompetanse til å sleppe autonome skip til sjøs – eller må vi samarbeide enda meir nasjonalt og internasjonalt for å gjere automatisert transport verkeleg?

Kartverket, ITS Norway og Norsk romsenter  set posisjon, navigasjon og nordisk samarbeid til sjøs som tema på Posisjonskonferansen 2023. For kva skal til for å få til intelligente transportsystem på maritim side?

Vi har samla ei rekkje forskarar og foredragshaldarar som har si oppfatning om kva som skal til for å sørge for automatisert transport til sjøs.

På programmet

Lær meir om korleis posisjonsteknologien kan medverke til å verkeleggjere autonom transport langs kysten. Kor presise må posisjonstenestene og referanserammene vere i framtida?

Det blir foredrag frå m.a. Sjøfartsdirektoratet, Kystverket, Forsvarets forskingsinstitutt og Lantmäteriet. Vi skal få høyre om spennande bruk i industrien frå m.a. HIVE Autonomy, HYKE og Fugro – og frå studentorganisasjonen Navier USN som har designa ei autonom sjødrone.

– Vi ventar oss ein konferanse med mykje god fagleg diskusjon og lærerik innsikt i korleis ITS bidreg til å forme ein tryggare sjøfart, seier Ingrid Fausk som leiar programkomiteen.

Sjå konferanse-program og påmelding.

Posisjonskonferansen

Konferansen er ein møteplass for aktørar i offentleg og privat sektor som bruker, eller kan ta i bruk, posisjonsteknologi m.a. for å effektivisere og auke verdiskaping. Posisjonskonferansen er gratis og det blir servert lunsj.