Aslak Sverdrup ny regiondirektør for Innovasjon Noreg i Vestland

- Det er ei glede for oss å få på plass Aslak Sverdrup som den nye regiondirektøren i Innovasjon Noreg i Vestland, seier divisjonsleiar for samfunnsutvikling og næring i Innovasjon Noreg, Ingelin Drøpping. 

Sverdrup har vore direktør i Akvariet i Bergen sidan 2019. Under Sverdrups leiing har Akvariet i Bergen nådd viktige milepålar og forsterka sin posisjon som ein av byens mest kjende attraksjonar. Sverdrup har leiarutdanning frå Forsvaret, og han har også erfaring som gründer. Han har vore mentor for startup-miljø, og har styreerfaring frå viktige aktørar som Flytoget, Bergen næringsråd og Visit Bergen. 

- I Aslak får vi ein erfaren og visjonær leder med  kundeperspektiv  og ikkje minst eit stort samfunnsengasjement.  Vestland er ein stor region med ambisiøs agenda for det grøne skiftet og Aslak si erfaring og nettverk vil hjelpe oss i dette arbeidet.  Han er svært velkomen til region Vestland.   

Den kommande regionleiaren gler seg til å starte i jobben i Innovasjon Noreg: 

- Eg er utruleg stolt og glad over å ha blitt gitt denne moglegheita, og gler meg til å starte i ny stilling i mars. Vestland er ein fantastisk region med eit kraftfullt næringsliv med høg kompetanse. Å bidra til nyskaping saman med dette verdsleiande næringslivet vert veldig spanande. Eg ser fram til å møte nye kollegaer og samarbeidspartnarar på nyåret, og til å jobbe med resten av Innovasjon Noreg nasjonalt og internasjonalt. Eg er svært takksam for åra ved stiftelsen Akvariet i Bergen. Fram til mars skal eg jobbe hardt med pionerarbeid på Dokken og sikre gode beslutningar for havet fram til ny leiar er på plass. 

Aslak Sverdrup tiltrer stillinga 1. mars.