Seks dødsfall i septembertrafikken i Vestland

– Dette er ei urovekkande utvikling, seier seksjonsleiar Torun Emma Torheim i Statens vegvesen.
– Me må fleire år tilbake for å finna slike tal.

I heile 2022 døydde 8 personar i trafikken i Vestland, i 2021 var talet 7.

Søkelys på trafikksikkerheita

– Dette viser kor viktig det er at me har full styrke på trafikksikkerheitsarbeidet. Me jobbar heile tida med tiltak for å redusera talet på ulukker og nå Nullvisjonen om ingen drepne eller hardt skadde i trafikken, seier Torheim.

Ho minner om at me som ferdast i trafikken har ansvar for å vera merksame og omsynsfulle, og kjem samstundes med ei oppfordring:

– No kjem hausten for fullt. Når det blir mørkt større delar av døgnet er det enda viktigare å passa på at me er synlege for kvarandre. Bruk refleks og lys når du går eller syklar! Køyreforholda blir også vanskelegare, med lauv, vatn og is som gjer vegbana glatt. Nokre stader kan også snøen vera rett om hjørnet. Tilpass farten etter forholda.

Høge dødstal også på landbasis

Også på landsbasis ser det mørkt ut i år. Etter mange år med positiv utvikling i ulukkestala har trenden snudd i 2022 og 2023. Ved utgangen av september hadde 100 menneske mista livet i trafikken. På same tid i fjor var talet 89.

– Det var totalt 19 dødsfall i trafikken i september. Ikkje sidan 2013 har like mange omkomme i den første haustmånaden, fortel Torheim.

Nokre nasjonale trendar peiker seg ut. Vanlegvis ser me at det er noko fleire omkomne på fylkesveg enn på riksveg. I år er det omvendt. Dette gjeld også for Vestland, der 9 av dei totalt 13 dødsfalla har skjedd på riksvegar, 4 på fylkesvegar.

Mange ulukker med fleire omkomne er med på å dra tala opp. Berre dei siste tre månadane har ein sett sju slike ulukker. Det er også fleire omkomne i personbilar i år.

Færre i aldersgruppa over 65 år har døydd i trafikken i 2023, men det er mange omkomne blant dei heilt unge (16 -24 år) og dei middelaldrande (44-64).

Dødsulykker i trafikken per 1. oktober. Tala for 2023 er førebels.

Fylke	2014	2015	2016	2017	2018	2019	2020	2021	2022	2023*
Innlandet	3	5	12	9	6	8	10	8	7	15
Viken	26	10	24	11	13	16	15	18	19	18
Oslo	2	3	4	2	4	1	4	1	3	1
Vestfold og Telemark	9	6	9	6	9	8	10	5	10	4
Agder	3	8	7	3	8	7	2	4	5	7
Rogaland	6	2	13	6	8	1	4	4	11	11
Vestland	9	3	9	13	12	8	4	7	8	13
Møre og Romsdal	3	2	4	3	5	6	2	3	2	3
Trøndelag	8	2	13	8	5	5	3	6	7	10
Nordland	4	1	6	5	5	12	8	2	10	11
Troms og Finnmark	2	5	10	6	4	3	4	8	7	7
SUM	75	47	111	72	79	75	66	66	89	100

Ulykkesstatistikk 2023 | Statens vegvesen