Ingebjørg Bratland og Odd Nordstoga Langt Heimafrå

I 2013 gav me ut albumet «Heimafrå» og spelte 134 konsertar, i alt frå ungdomshus, kulturhus og grendehus, før me avslutta i operaen i Oslo. Det var debutalbumet til Ingebjørg. Odd derimot hadde mange album og turnéar bak seg. 2013 var eit langt, men morosamt år. Og vips var det 10 år sidan så no var det kanskje passande og gjera eit nytt album og ein ny turné.

«Heimafrå» var ei samling viser ifrå folkemusikktradisjonen begge er fostra opp i. Oppfylgjaren «Langt heimafrå» har litt av det same i seg. Men, som tittelen hintar om, er perspektivet endra. Framleis kling det av folkemusikken både i stemmene og i tradisjonstoffet. Men dette har fått selskap av nyskrevne låtar. Produksjonen er også støre, og losa i hamn av smått legendariske Kåre Chr. Vestrheim.

Grunnstamma til albumet vart spelt inn i Propeller Music Division med Mats Eilertsen på bass og Pål Hausken på trommer. Så drog Kåre, Ingebjørg og Odd over til Roundstone i Irland for å legge på irske fløyter, fele og song. Begge to er glad i den Irske musikken, og kanskje kunne eit møte med denne legge til noko fint til heile prosjektet, tenkte dei. Og det blei fint! Det blei ikkje feil å legge til ein dåm av salt hav og vide horisontar til ein klukkande fjellbekk frå Telemark.

I Roundstone møtte me søskenparet Séamus og Caoimhe Uí Fhlatharta. Dei bidrog med irske fløyter, bodhran, fele, irsk harpe og song på plata. Séamus og Caoimhe voks opp i Connemara, som er ein viktig region for den irske folkemusikken og det irske språket; gæilisk. Roundstone ligg forøvrig óg i Connemara.

«Sud-Sauar-Jon, «I mine Kåte ungdomsdagar», «Anton» og «Å, Kjære mi Sigrid» er songar henta frå Telemark, frå vår folkemusikktradsjon.

«The Evelyn Marie» er ei irsk vise Ingebjørg lærte då ho var på rundreise med mor, far og syster i Irland, sommaren 2002. Songen om fisketrålaren Evelyn Marie som sank utanfor Donegal i 1975. Dette blei det siste sporet på albumet, som ein slags gest til det irske musikalske bidraget me fekk i Roundstone. Dette er også fyrste gong Ingebjørg syng eiin song på engelsk, på eit album.

Dei resterande songane har Odd skrive. To av dei: «Heimlandsong» og «Ingenting å vera redd for» som alt er utgjevne.

Det er eit priveligum å ta ein sideveg ein gong i blant. «Langt heimafrå» er ein slik sideveg for oss. Eit overskotsprosjekt, som me gler oss til å reise ut på vegen med. Og ikkje minst å få framføre denne musikken for folk over heile det langstrakte landet vårt.

Med "Langt Heimafrå" skal Ingebjørg Bratland & Odd Nordstoga ut på en stor noregsturné hausten 2023 og vinteren 2024. Turnéliste og billetter finner du her: https://allthingslive.no/heimafra