Heimlandsong ser for seg å vera ute på det store frie havet, men der heimen likevel kviskrar i alle ting.

Det er mange som har sitt arbeid på havet i dette landet. Også i Vinje er det slik, der Odd og Ingebjørg kjem frå. Der, som i andre små bygder, er det mange som jobbar på Nordsjøen. Men ein høyrer liksom ikkje så mykje om livet der ute. «Kva gjer du?» «Å, eg er i Nordsjøen.» Så blir det liksom med det. Kanskje eg kunne lage ein song? tenkte Odd. Ein song til alle desse pendlarane som er borte i tre veker i strekk og kjem heim att, og så er alt som vanleg.

Artistar er også farande fantar, og kanskje er det derfor ordet «heim» blir eit så uutgrunneleg ord. Men det ligg så godt i munnen og det syng så godt, det ordet. Og aldri så godt som når ein er langt heimafrå. Det er kring dette tankane vandra når «Heimlandsong» kom til.


Langt heimafrå som ventas 22. september er oppfylgjaren til Heimafrå som kom ut i 2013. Det var Odd og Ingebjørgs fyrste felles albumprosjekt. Før det hadde Ingebjørg sunge på til dømes Odd sin låt «Jul i Svingen», ein låt som framleis er duoens solid mest spelte på Spotify, med sine over 20 millionar streams.

Heimafrå var ei samling viser ifrå folkemusikktradisjonen begge er fostra opp i. Oppfylgjaren «Langt heimafrå» har litt av det same i seg. Men, som tittelen hintar om, er perspektivet endra. Framleis kling det av folkemusikken både i stemmene og i tradisjonstoffet. Men dette har fått selskap av nyskrevne låtar. Produksjonen er også støre, og losa i hamn av smått legendariske Kåre Chr. Vestrheim.

Grunnstamma til albumet vart spelt inn i Propeller Music Division med Mats Eilertsen på bass og Pål Hausken på trommer. Så drog Kåre, Ingebjørg og Odd over til Roundstone i Irland for å legge på irske fløyter, fele og song. Begge to er glad i den Irske musikken, og kanskje kunne eit møte med denne legge til noko fint til heile prosjektet, tenkte dei. Og det blei fint! Det blei ikkje feil å legge til ein dåm av salt hav og vide horisontar til ein klukkande fjellbekk frå Telemark.