Varm velkomst til dei nye UiS-studentane

«Hei student!» står det på flagg i heile Stavanger-regionen i desse dagar. Rundt 60 butikkar og serveringsstader har same helsing på døra, for å syne at her får studentar avslag i pris.

Det er Studentsamskipnaden i Stavanger (SiS) som har fått heile regionen til å gi studentane ein varm velkomst på denne måten.

Joakim Sunde og Melvin Lystad, to ferske bachelorstudentar i datateknologi, synes det er bra – og kanskje spesielt når det lokale næringslivet stiller opp.

– Vi studentar har lite nok pengar frå før, så det er positivt om vi kan få rabattar, seier Joakim Sunde.

Håpar på nye vener

Hans ferske studiekamerat Melvin har forventningar om mykje hardt arbeid i åra som kjem.

– Eg reknar med at mye tid vil gå med på studiet, men håper også at eg får nye vener og blir del av eit godt miljø, seier han.

Saman med rundt tusen andre studentar møtte Joakim og Melvin opp i fadderteltet for å delta på årets semesterstart-arrangement. Der venta mellom anna rektor Klaus Mohn for å ta dei imot.

Grøn omstilling

Rektor ønskte velkomen til eit universitet som satsar stort på grøn omstilling og legg til rette for miljøvenlege val.

– Her kjem ungdommeleg kreativitet, vilje og pågangsmot godt med. Eg håpar du vil engasjere deg. Ved å ruste deg for eit arbeidsliv i omstilling kan du være med og vise veg, for ei grønare framtid, sa  Mohn.

- Vi treng folk

Ordførar Kari Nessa Nordtun ønskte velkomen til ein by som i tillegg til olje og vasskraft, også er prega av oppstartsverksemder, hydrogen, havbruk og helseteknologi. Ein kommune som produserer halvparten av tomatane i Noreg og ein fjerdedel av laksen. Ein by som riggar seg for framtida.

– De har vald eit universitet vi er skikkeleg stolte av, i ein region der det skjer ting, og der vi treng folk som aldri før, sa ho.

Pris for god formidling

Universitetsfondet pris for formidling og samfunnsengasjement blei delt ut under semesteropninga. Årets pris gjekk til forskar Ingvil Hellstrand, for hennar formidling om eit breitt spekter av tema, frå likestilling og omsorgsforsking til kunstig intelligens og science fiction.

Les meir her

Minikonsert

Skodespelar Alexandra Gjerpen loste dei om lag 1000 tilhøyrarane gjennom arrangementet.

Stavanger studentsangforening stod for musikalske innslag og til slutt fekk studentane ein minikonsert med indiepop-bandet Vettche frå Stavanger og Sandnes.

Kontaktperson:
Elin Nyberg
E-post: elin.nyberg@uis.no
Mobil 971 10 920