Riddu Riđđu lea virgádan ođđa buvttadeaddji

Erle Bårdsdatter Sæther lea virgáduvvon ođđa buvttadeaddjin álgoálbmotfestiválii Riddu Riđđu, mii lágiduvvo Olmmáivákkis Gáivuonas. 28-jahkásaš Harstakis/Ánddas eret lea geargamin virggis UiT:s, ja álgá festiválii čakčii.

- Riddu Riđđu lea máŋga jagi leamašan dehálaš munnje. Doppe lean ožžon eallima stuorámus kultuvrralaš vásáhusaid, lean deaivvadan muhtun mu buoremus ustibiiguin ja lean oahppan ollu sámi- ja eandalit mearrasámi kultuvrra birra. Mus lea ieš sámi sohka Davvi-Romssas eret, nu ahte fárret Olmmáivággái ja bargagoahtit Riddu Riđđus dovdo dego boahtit ruoktot, lohká Sæther. 

Sæther lea guhká leamaš oassi Riddu bearrašis ja sus lea earret eará leamaš ovddasvástádus klubba-konseapttas IDJA - Sámi Club Night. Son lea dasa lassin máŋga jagi leamaš buvttadanassisteantan Riddu Riđđus.

- Mun sávan ahte sáhtán joatkit dan buori barggu maid buvttadeaddjit mu ovdal leat dahkan, nu ahte min festivála ain galgá leat fátmmasteaddji ja loktet oidnosii álgoálbmogiid miehtá máilmmi, leat duostilis ja dehálaš jietna servodatdigaštallamiin Sámis ja leat oadjebas deaivvadanbáiki buohkaide. Mun sávan seammás ahte mus leat ávkkálaš vásáhusat maiguin sáhtán leat mielde ovddideamen festivála ain buorebun.

Riddu Riđđu festiválajođiheaddji, Sajje Solbakk, lea ilus virgádemiin:

- Mis ledje olu buorit ohccit, ja leat hui duhtavaččat go Erle šaddá min ođđa buvttadeaddjin! Sus lea viiddis fierpmádat sihke Sámis ja olggobealde mii šaddá mávssolaš resursan midjiide. Erles lea nanu gelbbolašvuohta lágideamis ja dovdá festivála bures ovdalaččas. Dasa lassin lea suinna duohta illu ovttasbargat: Fágalaččat čeahppi, buorre mokta ja hirpmástuhtti bargoveahka!