Riddu Riđđu lea gearggus garra ságastallamiidda

Duohtavuođa- ja Soabadankommišuvdna dáhttu kultursuorggi bargat dan ala ahte olahit soabaheami servodagas. Dan servodatdoaimma lea Riddu Riđđu álggu rájes váldán badjelasas, muhto ii šatta unnit dehálaš dán jagi. Dán jagáš prográmmas leat geahččalan láhččet saji daid čiekŋaleamos ságastallamiidda, nu ahte beassat nubbi nuppi lagabui, lohká Solbakk.

Dán jagi almmuha festivála dasto ođđa konseapta, lassin semináraprográmmii: Ságastallanráiddu maid leat válljen gohčodit Lávvosáhka. Dáinna jurdagiin festiválajođiheaddji áigu fállat molssaeavttu oarjemáilmmi ságastallanmálliide, ja baicca máhccat ruovttoluotta iežas kultuvrra ruohttasiidda. Lávdi biddjo eret, ja rádji gaskal gehččiid ja ságastalliid ii galgga leat seamma čielggas. Dáinna lágiin sávvá festivála ahte buot dovddut ja jurdagat mat spontánalaččat čuožžilit lanjas, álkibut galget gaskustuvvot.

Jáhkán ollugat leat vásihan ahte buoremus ságastallamat dáhpáhuvvet go mii čohkkát ovttas, áinnas dollagáttis dahje lávus. Lea dát oahpes oadjebasvuođadovdu mii galgá vuođđun og Lávvosáhka-ságastallamiin galgat guoskkahit fáttáid nugo seksuála illásteami Sámis, jávohisivuođa ja kultuvrra massima, joatká festiválajođiheaddji.

Dasa lassin galget muhtun miellahtut Duohtavuođa- ja Soabadankommišuvnnas deaivvadit ságastallamis "Leat go dát duohtavuohta?", Dievdduid lávdegoddi lea bovdejuvvon jođihit ságastallama Sámi dievddu dásseárvohástalusaid birra, ja stuorát álgoálbmotdelegašuvdna Ruoššas boahtá muitalit mo soahti váikkuha sidjiide persovnnalaččat.

Buot lea láhččojuvvon nu ahte dát šaddá festivála mas ollu storra vásáhusat. Ja vaikko mii galgat duostat dustet váttes áššiid, de galgat dieđusge dánsut ja suohtastallat seammás!, loahpaha Solbakk.