Ukrainalaš elektrofolk joavku boahtá Riddu Riđđu festiválii

Ukrainalaš elektrofolk-čuojahanjoavku Go_A ovddastii Ukraina Eurovision Song Contest nammasaš gilvvus Rotterdam gávpogis jagi 2021, ja sin lávlla man namma lea "Shum" ollii loahppagilvvus viđat sadjái. Go_A joavku ráhkada ođđa-áigásaš dulkoma ukrainalaš folklore-kultuvrras masa gullet ollu elektrovnnalaš jienat. Čuojahanjoavkku namas leat sánit "Go" mii mearkkaša "lihkadeami" ja "A" mii lea dološ greikkálaš bustávva "alfa", mii symbolan govvida kultuvrralaš ruohttašiid ja buot áššiid álggu.

Sin musihka guovdilis ášši lea aiddonassii muitalusat: namalassii ođđasit muitalit árbevirolaš muitalusaid mat leat johtán sogas sohkii. Kateryna Pavlenko, guhte lea joavkku lávlu, váldá atnui dološ nuorta-eurohpalaš folklore-vuogi jienainis, mas čotta lea áibbas rabas ja nu allat go fal vejolaš. Joavku buktá ovdan čielga ávžžuhusa: Doarjut mii ovttasráđiid ukrainalaš kultuvrra!

Festiválahoavda Sajje Solbakk vuorddaša iluin beassat suoidnemánus oaidnit dán namahuvvon geasuheaddji čuojahanjoavkku lávddis:

- Go_A joavkkus leat áibbas sierralágan jienat mat hohkahit olbmuid dánsut! Sii eai aivvestassii buvtte ovdan erenoamáš vásáhusaid lávddis, go sii atnet maid vejolašvuođa muitalit duon issoras soađi birra mii lea Ukrainas. Illudan go beasan guldalit Go_A joavkku deavdimin Riddu-duolbana dánsehahtti musihkain ja buoššivuođain!

Lihput Riddu Riđđu festivála 2023 várás leat dál fidnemassii dás: riddu.no. Ovdal lea Festivála dieđihan ahte čuovvovaččat servet prográmmii: Ana Tijoux, Rolffa, Frank Waln, Katarina Barruk, Lávre Stand-up: Isalill Kolpus, Hildá & Tuomas, Hva er det som spiser meg om natten, Small time giants, Manne ja 7 % samisk nammasaš čájálmas.