Brannøving i Eidfjordtunnelen

Øvinga varar frå klokka 18.00 - 20.00. Det blir korte stengingar og trafikkavvikling med kolonnekøyring og ledebil.

Tunnelen vil bli stengd i to omgangar: Éin gong når Statens vegvesen testar lokalstyring, og éin gong under sjølve brannvernøvinga.

Det vil vera internsamband mellom øvingsleiing og trafikkdirigentar for å gjennomføra trafikkavvikling og stenging effektivt så det ikkje skal påverka trafikantane unødig, samtidig som Statens vegvesen varetek tryggleiken for deltakarane.

Dette er tunnelen

Den 2070 meter lange Eidfjordtunnelen på riksveg 7 ligg i Eidfjord kommune i Vestland, mellom Hardangerbrua og Hardangervidda.

Tunnelen vart opna i 1976 og erstatta då tre kortare tunnelar ved oppstiginga til den bratte Måbødalen opp mot Hardangervidda.

Den blir gjennomsnittleg trafikkert av 1.700 køyretøy i døgnet. Det er dette som vert kalla årsdøgntrafikk (ÅDT). Av dette er 16 prosent, eller 272, lange køyretøy (tungtrafikk).

Trygg tunnel

– Vi har forståing for at stengde tunnelar kan skapa utfordringar for trafikantane. Men då er det viktig å minna om at vi gjer det nettopp for dei, som ein del av arbeidet med å halda tunnelane trygge, seier brannvernleiar Ove Edgar Amundsen i Statens vegvesen.

Det er krav i tunnelsikkerheitsforskrifta og for tryggleiksgodkjenning at vi skal halda slike beredskapsøvingar, utdjupar han.

Samfunnsberedskap

Statens vegvesen er en del av den totale samfunnsberedskapen. Å førebu seg på andre situasjonar enn kvardagen er ein sentral del av dette.

– Vegdrift handlar om konsekvens. Vi gjer derfor det vi kan for at stengingar, både akutte og planlagde, skal bli så korte som mogleg, legg Amundsen til.

– Beredskapsøving i tunnelar er eit døme på ei planlagd og naudsynt stenging. Ved å øva saman med nadetatane drillar vi våre rutinar og sørger for at beredskapslinjene er best mogleg førebudde den dagen ein situasjon skulle inntreffa, avsluttar han.

Øvingar som denne er ein av viktig del av Statens vegvesens kontinuerlege arbeid med å syta for eit effektivt, trygt og føreseieleg framkomeleg vegnett.