Mearehis alla sámi partydássi dán jagi Riddu Riđđus

Sii dadjet iežaset leat dat joavku Finnmárkkus mii dáhkida partydovddu, iige dárbbaš eahpidit ge besset go Ridduguossit feret albma riđu Finnmárkkujoavkkus Rolffas suoidnemánus. Rolffa beaškkehii karrieara johtui «Partyjoik» lávlagiin, mii maŋŋel lea dadjon leat “Finnmárkku álbmotlávlla”. Olles 12 jagi leat gollan dan rájes go joavku maŋemus čuojahii Riddu Riđđus, ja dál máhccet viimmat dát gehččiidjiellahat čáppa Olmmáivággái.

Jietnaduovdagis, man vuođđun lea improvisašuvdna ja latnja gaskal gájanasa ja ritmmaid, deaivvada Hildá eteralaš vokála Tuomasa samplingaiguin. Tuomas Norvio bargá jietnahábmejeaddjin, komponistan, musihkarin ja buvttadeaddjin ja sus lea duogáš elektronikas. Hildá Länsman lea beaggán komponistan, teakstačállin ja bálkkašumiid vuoiti musihkarin, ja vel juoiganárbevieru áŋgiruššin. Dát guovttis leaba dahkan musihka ovttas jagi 2017 rájes ja čuojaheaba vuosttaš geardde Riddu Riđđus dán geasi.  

Festiválajođiheaddji Sajje Solbakk lea duhtavaš luoitimiin:

“Rolffa ja Hildá & Tuomasa konsearttat šaddet áibbas vilda vásáhusat! Diehtit ahte oallugat min gussiin leat sávvan Rolffa lávdde nala máŋga jagi juo ja lea suohtas sáhttit addit sidjiide dán. Hildá lea máŋgga háve čuojahan midjiide eará prošeavttain ja guođđá álo čiekŋalis luottaid vuoibmás jienainis ja gaskkustanattáldagainis. Su vokála ovttas Tuomasa samplingaiguin lea skeaŋka Sápmái!”

Bileahttat Riddu Riđđu festiválii 2023 leat dál vuovdimassii neahttačujuhusas riddu.no. Ovdalis lea festivála almmuhan dáid artisttaid dán geasi prográmmii: Ana Tijoux, Resirkulert, Katarina Barruk, Lávre ja Manne.