Trua på det utrulege

– Vi feirar ikkje våre meiningar. Vi feirar Jesus som overvandt døden. Ja, vi feirar livet, sjølve livet, livets opphav, livets Gud – og at Gud er midt i mellom oss.

Det seier Olav Fykse Tveikt. Han er leiande biskop i Den norske kyrkja og heldt preika i Nidarosdomen på første påskedag.

Han understreka at påskebodskapen vert feira overalt – også utanfor kyrkjeroma:

– I gudstenester ute og der vi måtte vere. Også med god mat og drikke, med familie og vener i heimane våre eller i hytter til fjells. Eller andre stader.

Trur du på oppstoda?

Fykse Tveit ynskjer ei fornya påskefeiring for å enda betre få fram kva som vert feira i den kristne påskefeiringa. Han siktar til meiningsmålingar før påskehøgtida.

– 9 av 10 seier dei ikkje trur at Jesus sto fysisk opp frå dei døde.

Men han poengterer at kyrkja ikkje feirar påske for å forandre meiningsmålingane:

– Det som skjedde den første påskedagen vert ikkje meir eller mindre sant alt etter kor mange nordmenn som seier dei trur på det eller ikkje.

Å velje å tru

– Den kristne trua på oppstoda er trua på det u-trulege, på det usannsynlege. Difor er det noko heilt anna enn det vi resonnerer oss fram til. Enten ved å bygge på kjente fenomen, eller resonnement over kva kunne ha ført til dette.

Han kjem med fleire døme på kva vi trur på, sjølv om vi ikkje alltid erfarer det:

– Trur vi ikkje på livets kraft? Trur vi på kjærleiken? Trur vi på det godes kraft? Trur vi på framtida? Trur vi på rettferda?

Fykse Tveit meiner dette er verdt å tru på, sjølv om vi ikkje alltid forstår det. Det handlar om å velje å tru på det:

– På same måte kan vi velje å tru at det er Gud som står bak det vi høyrer og feirar på påskedag. Og difor har det skjedd. Og difor har det betydning også for oss.

Les heile påskedagspreika her.