Førdefestivalen har sleppt heile programmet

Ønskjer å overraske

Førdefestivalen ønskjer å skape forståing på tvers av kulturar, religion og tradisjonar. -Vi vil vere ei motvekt til mainstream-kulturen ved å tilby eit program som kan overraske og gje publikum nye impulsar, seier den nye direktøren. Artistlista på Førdefestivalen er, har vore og skal vere utan sidestykke i Norge!

I år byggjer festivalen på temaet DRAUMAR. -Etter eit par spesielle år både globalt og lokalt, er det behov for litt lettare tema, litt luft under vengjene, seier festivaldirektøren. Gjennom musikken kan ein drøyme seg bort, og i musikken kan ein vere fri. Draumar er noko vi alle ber på, det er noko festivalen ønskjer å formidle.  

Artistar med store draumar

Draumen om fridom er ei viktig drivkraft for fleire av artistane på festivalen. Til dømes haïti-amerikanske Leyla McCalla som i prosjektet Breaking the Termometer to hide the fever hentar fram den sterke historia til radiostasjonen Radio Haiti, som vart folket si stemme i kampen mot den diktatoriske presidenten. Eigaren av Radio Haiti ofra alt for draumen om fridom for folket!

Yungchen Lhamo frå Tibet er verdskjend for si utanomjordisk vakre stemme. Ho har sunge med kjende namn som Peter Gabriel, U2, Sir Paul McCartney, Annie Lennox og Sinnead O’Connor og fleire andre. -Yungchen Lhamo syng iallfall som ein draum, og om musikk kan gje deg sjelefred, må det vere musikken hennar, meiner festivaldirektøren, og tipsar om årets kyrkjekonsert på Førdefestivalen.

Festivalpasset – attraktivt for endå fleire

Førdefestivalen har eksistert i over 30 år, og mykje har endra seg sidan dei første utgåvene. Utvikling og testing er nøkkelord for å gjere festivalen attraktiv for fleire, og i år gjer vi det vi vi må kalle ei stor endring i innhaldet i festivalpasset, fortel Lien. Prinsippet er det same som før, at du ved å kjøpe festivalpass får tilgang til fem store konsertar og i tillegg oppnår stor rabatt på andre konsertar, men til sommaren vil tre av dei fem konsertane vere på laurdag.

Sjekk kva du får for ein tusenlapp på Førdefestivalen: Opningskonserten – DRAUMAR torsdag; konsert med songdronninga Eneida Marta frå Guinea Bissau fredag kveld; laurdag ettermiddag får du konsert med det colombianske fyrverkeriet Cimarrón i parken, og litt seinare får du ein nydeleg dobbelkonsert, med det skotske superbandet Breabach og Gatehouse frå Irland i idrettshallen, før du rundar av med FESTIVALNATTA i Sunnfjordsalen på Scandic, der Nkumba System slår til med sin energiske miks av afrikanske og karibiske rytmar før Kanda Bongo Man, sjølve kongen av soukous, vartar opp med den heitaste dansemusikken som har kome frå Afrika på fleire tiår. -Og i tillegg gjev passet store rabattar på alle andre arrangement på festivalen, legg direktøren til.

Skotske, irske og ungarske stjerner

Breabach er ein av dei største internasjonale suksessane i skotsk folkemusikk, og har stått på festivalen si ønskjeliste lenge. -Når dei no endeleg kjem til Førde, var det berre å rydde plass på den største scena, seier Lien, og gler seg til ein storslagen irsk/skotsk konsert på laurdagskvelden. Breabach deler konsert med kvartetten Gatehouse, som leverer vakre irske musikkperler på ei snor!

Søndag ettermiddag byr på eit nytt møte med ungarske Mónika Lakatos og hennar nyaste ensemble, The Gypsy Voices. MónikaLakatos har vunne internasjonale prisar for arbeidet sitt med å ta vare på og fremje Oláh Romani-tradisjonen. -Musikken er kvikk og energisk, med sterk fleirstemd vokal, og musikarar som trakterer viktige tradisjonsinstrument som mjølkespann og skeier! Ein liten fest av ein konsert trur direktøren det blir.

Mongolsk strupesong og musikalsk siesta

Førdefestivalen var først ute med å presentere mongolsk strupesong på ei norsk scene. Det skjedde på nittitalet, og sidan har denne songtradisjonen stått på programmet i Førde med ujamne mellomrom. I år følgjer den nye direktøren opp med å presentere ein av sine favorittar, Khusugtun, og deira unike fleirstemde overtone- og strupesong.

I år får publikum også tilbod om ein ‘musikalsk siesta’. Når duoen Ablaye Cissoko & Cyrille Brotto spelar i festsalen, vil salen vere rigga for at publikum skal få litt ekstra komfort, så dei kan lene seg tilbake, late att auga og drøyme seg inn i musikken.

Fest på festivalhotellet

På ei av dei beste konsertscenene i landet, Larris Scene, på Scandic Sunnfjord Hotel, blir det mange og varierte godbitar i løpet av festivalen. Alt onsdag kveld er det duka for eksotiske rytmar når den unge ørkenblues-stjerna frå Mali, Kader Tarhanine, går på scena.

Torsdag etter opningskonserten vil det norske fenomenet Gangar ta folkemusikkfesten til eit nytt nivå med sin elleville kombinasjon av folkemusikk og alle moglege sjangrar. -Er du blant dei som har sakna eit norsk folkrock band, så har du dei her! Mattias Thedens og hans menn er eit konsertband som leverer hardt og godt frå første slått; Kompromisslaust tradisjonelt og veldig rocka på ein gong, i følgje festivaldirektør Lien.

Fredag kveld blir det dobbelkonsert med fabelaktige musikarar. Først Daniel Lazar sitt tingingsverk Phantasmagoria, der han stiller med stjernemusikarar både frå Balkan og Norge: Jelena Tomasevic, ein av dei største songstjernene i Serbia, Almir Meskovic frå Bosnia, Daniel Herskedal, den norske tubaisten som har fått sitt internasjonale gjennombrot dei siste åra, og Greg Miszczyszyn, ein trollmann på elektronikk.

Same kveld, og på same billett, får du oppleve den fransk-marokkanske gruppa Bab L’Bluz, som har teke verda med storm med sin marokkanske gnawa-blues. I tillegg spelar DJ Nefertiti både mellom setta og til slutt på kvelden.

Folkemusikklandslaget til Førde

Landslaget for spelemenn er tittelen på ein stor jubileumsproduksjon i samband med 100 års-jubileet for FolkOrg (tidlegare LFS - Landslaget for spelemenn). Landslaget anno 2023 er leia av manager og strateg Jørund Fluge Samuelsen og anker Veslemøy Narvesen. Spelarane er: Sondre Meisfjord, Ronny Kjøsen, Juhani Silvola, Ragnhild Furebotten, Erik Sollid og Tuva Syvertsen. På benken i Førde sit Sigrid Moldestad, Liv Merete Kroken og Indre Sunnfjord Spelemannslag. Denne konsertproduksjonen skjer i samarbeid med FolkOrg, Riksscenen og Vossa Jazz.

Benedicte Maurseth, Sivert Holmen og Silje Onstad Hålien spelar ikkje på folkemusikklandslaget, men kjem med sine eigne framsyningar til Førde. Maurseth viser Systerspel, ei framsyning der ho fortel historia om kvinnene sin plass i tradisjonen. Dei to andre vert å sjå i urpremieren på Differens, ein duett mellom ein koreograferande dansar og ein dansande musikar!

Stort barne- og familieprogram

Førdefestivalen er ein vibrerande møteplass for alle generasjonar, og satsar på eit kvalitetsprogram for barn og barnefamiliar. Onsdag ettermiddag går det etter kvart tradisjonsrike Ut på tur, aldri sur!-arrangementet av stabelen på Sunnfjord Museum. Tur først, så konsert med Nina Fjeldet og Silje Onstad Hålien og deira Danse, sa fela! Laurdag står Reglebein, reglebein! på programmet, ein fantasifull familiekonsert med ni musikarar og dansarar på scena.

I tillegg får fem barnehagar i Førde, Jølster, Bygstad og Naustdal gratis Morgonstund-konsertar. Tre føremiddagar er det gratiskonsertar på Torgscena ved Elvetorget, laurdag er det stor internasjonal frukost i parken på Festplassen, og same stad er det søndag gratis familiesøndag med musikk og aktivitetar. - I år har vi også draumefangarverkstad og ikkje minst ein spennande drageverkstad, der borna får lære å lage drage av Ajaz Ul Haq, som er verdas beste drageflygar, fortel ein stolt direktør.