Flytrafikken i februar er framleis under normalen

– Flytrafikken i februar er i tråd med prognosane våre frå i haust. Sjølv om det er veldig mange fleire som reiser enn i fjor, ligg februartala framleis 16 prosent etter 2019. Det er venta at flytrafikken vil liggje under 2019-nivå også resten av året, og at vi for året under eitt, er på om lag 91 prosent av 2019-nivået, seier trafikkdirektør i Avinor, Gaute Skallerud Riise.

- Det er skilnader frå lufthamn til lufthamn. Oslo hadde meir enn 1,6 millionar passasjerar i februar. Dette er 19 prosent under tala for februar 2019. Om ein ser på Bergen lufthamn ligg tala berre 4 prosent bak 2019. Den hovudsaklege årsaka til dette er Widerøe si satsing i Bergen, og slusing av passasjerar over Bergen som knutepunkt. Også Stavanger og Trondheim er nærare 2019-nivå enn Oslo lufthamn. Men Oslo lufthamn har størst volum, altså flest passasjerar, og har difor størst påverknad på dei totale tala for Avinor, forklarer Riise.

Skallerud Riise har tru på sommartrafikken:

-Det er særleg utanlandstrafikken som dreg ned volumet, medan innalandstala har henta seg betre inn etter pandemien. Sjølv om det er lenge til sommaren, er det mykje som tyder på at vi vil sjå at denne skilnaden kjem til å halde fram. Vi ventar at innanlandstrafikken vil vere nær 2019-nivået i sommarmånadene, før han fell noko tilbake utover hausten. Vi ventar også at utanlandstrafikken gradvis hentar seg vidare inn framover, sjølv om han er venta å liggje eit stykke under sommartrafikken i normalåret 2019, avsluttar Riise.

Flyrørsler

Det var 49 893 kommersielle flyrørsler i februar 2023. Dette er ein auke på 15 prosent frå februar 2022. Om ein samanliknar med februar i 2019, har det vore ein nedgang i talet på flyrørsler på 13 prosent.

Trafikken utanlands

1 191 693 passasjerar har reist mellom Avinor sine lufthamner og utlandet i februar. Same månad i fjor reiste noko over 700 000 passasjerar til utlandet. Det betyr at trafikken utanlands har auka med 70 prosent samanlikna med i fjor, da luftfarten framleis var råka av pandemi og reiserestriksjonar.

Om ein samanliknar med 2019, er det 20 prosent nedgang i utanlandstrafikken i februar.

Trafikken innanlands

2 038 645 reiste innanlands i februar i år. Det er 35 prosent fleire enn i februar i fjor.

Samanlikna med februar 2019 har det vore ein nedgang på 14 prosent.

Her er passasjertala frå dei store lufthamnene, samt DRL = dei regionale lufthamnene, samanlikna med 2022:

	Februar			Hittil i år
Lufthamn	2022	2023	Endring	2022	2023	Endring
Oslo	1 043 000	1 628 000	56 %	1 882 000	3 206 000	70 %
Bergen	313 000	415 000	33 %	585 000	829 000	42 %
Trondheim	193 000	284 000	48 %	355 000	556 000	57 %
Stavanger	173 000	261 000	51 %	320 000	523 000	63 %
DRL	529 000	681 000	29 %	986 000	1 354 000	37 %
Avinor	2 250 000	3 269 000	45 %	4 128 000	6 468 000	57 %

Her er passasjertala frå dei store lufthamnene, samt DRL = dei regionale lufthamnene, samanlikna med 2019:

	Februar			Hittil i år
Lufthamn	2019	2023	Endring	2019	2023	Endring
Oslo	2 004 000	1 628 000	-19 %	3 954 000	3 206 000	-19 %
Bergen	434 000	415 000	-4 %	867 000	829 000	-4 %
Trondheim	322 000	284 000	-12 %	639 000	556 000	-13 %
Stavanger	301 000	261 000	-13 %	610 000	523 000	-14 %
DRL	822 000	681 000	-17 %	1 626 000	1 354 000	-17 %
Avinor	3 884 000	3 269 000	-16 %	7 695 000	6 468 000	-16 %

*Kvifor samanlikne med 2019?

2020 og 2021 vart hardt råka av reiseforbod, restriksjonar og sjukdom. 2019 var det siste året utan pandemi og krig i Ukraina, og var eit «normalår» kva gjeld reising.