Odd Nordstoga "I går"

Nokon dagar hender det ting som ein ikkje hadde forestilt seg.
Noko uventa. Noko dramatisk. Noko som snur opp ned på ting. Det kan vera i livet ditt, eller i samfunnet. Frå ein dag til ein annan, eller i ein augneblink, kan verda bli forandra. 

Når slikt hender er det rart å tenke på at ein har gått rundt så aldeles uvitande, som i ei skodde, og lagt lystige planar og innhald til nett desse dagane, som om ingenting skulle skje! – At ein skal til tannlegen veit ein ein månad på førehand, men at verda blir forandra veit ein fyrst etter det har hendt. Det er rart å tenke på, for ei pussig ordning. 

Eg gjekk på ei myr i Trysil på ski. Hadde høyrt og lese alt eg kom over om invasjonen i Ukraina. Dette i von om at nokon kunne svara på korleis dette kom til å gå. «Slik og slik og så kjem alt til å bli som før» Det var det eg glupsk leita etter i aviser og på radioen. Men det kom ikkje noko godt svar. 

Når eg kom heim laga eg «I går», som for å hugse på det, kor ulik den kan vera, kor fin den kan framstå med sine småting, den uvitande gårsdagen. 

Se video til «I går»: https://youtu.be/2xDmkogpTVU 
Regissert av Sigurd Fossen, Fill In productions

«I går» er siste singel ut fra Odd Nordstogas komande album "Inn i skogen", som er venta 7. oktober. 

Odd Nordstoga og hans eminente band skal ut på haustens store turné – Inn i skogen og ut på tur: https://oddnordstoga.no/#live 


I går

Ser rundt meg på dei ørsmå ting
Det varme vatnet ifrå kjøkenspring
ein omn som lyser for at den er på
Ein buss i gata som er ved å gå

På butikken er det fullt av mat
importerte eple og grøn salat
Eg tenkte ikkje på det der i går
Eg tenkte ikkje på det

I går så var det eigne draumar
og eigne hjartesår,
og snart så var det vår

I går så var det småting som var stort på TVn vår
No trur eg alle vel forstår
at det der, det var i går

På radioen er det ein ting i
For no har det kome ei heilt ny tid
Som kallar fram eit velkjend mareritt
som gjekk igjen på guteromet mitt:

Inn ifrå aust ut av ei grå, tung sky
skar rett imot to svarte jagarfly
eg tenkte ikkje på det der i går
eg tenkte ikkje på det

I går så var det eigne draumar
og eigne hjartesår,
og snart så var det vår

I går så var det småting som var stort på TVn vår
No trur eg alle vel forstår
at det der, det var i går