Sogn Avis og Firda flytter trykkinga til Voss

Styreleiar i Firda, Ole Morten Ona Ringdal, seier at avisbransjen står midt i ei stor omstilling. Stadig fleire brukar avisa digitalt, og talet på papiravisabonnentar er kraftig redusert. Alt tyder på at denne utviklinga vil halde fram. 

Å trykke aviser er dyrt. Når talet på aviser som skal trykkast er fallande, betyr dette at trykkekostnaden per avis blir høgre.

– Vi  må  heile tida finne dei mest optimale og kostnadseffektive måtane å produsere papiraviser på i åra som kjem. Å samle trykkinga av fleire aviser i eitt trykkeri er ei openberr  moglegheit til å redusere kostnadene. Reduserte utgifter kjem i neste omgang abonnentar og mediehusa til gode. Desse pengane  kan vi kan investere i å lage  innhald, seier Ringdal

Styreleiar i Sogn Avis og administrerande direktør i Firda, Svein Atle Huus, stiller seg bak dette: – Trass den sterke digitale utviklinga for Sogn Avis og Firda dei siste åra, har vi framleis ein stor del av kostnadane våre knytt til papirproduktet. Dette tvingar oss til å sjå på kostnadane våre, seier Huus. Målet er å bevare og helst styrke posisjonane våre i åra framover.

Styreleiar i Sogn og Fjordane Avistrykk, Morten Kringler, opplyser at dei tilsette på trykkeriet vart orientert om beslutninga tysdag. Styret i trykkeriet har i møte onsdag beslutta at det ikke lenger er grunnlag for drift for trykkeriet i Førde. 10 tilsette fordelt på 7-8 årsverk blir berørt av nedlegginga.

Dei andre avisene som blir trykte i Førde i dag er Firdaposten, Avisa Nordhordland, Firdaposten, Firda Tidend og Ytre Sogn. Dei er i dag orienterte om Firda og Sogn Avis sine styrevedtak. Firdaposten og Avisa Nordhordland som er 100 prosent Amedia-eigde, vil også flytte trykkinga til Voss som følge av nedlegginga av trykkeriet i Førde.

– Det er gjort ei grundig vurdering av distribusjonsopplegget og risikoen med tanke på lenger transport ved flytting av trykkinga til Voss. Vi klarer å halde trykketidene om lag som i dag, og då vil det vere meir enn nok tid til å få fram avisene til abonnentane i Sogn og Fjordane til same tid som i dag, seier Ringdal.