NTBs språkpris til Per Anders Todal i Dag og Tid

NTB delte ut språkprisen for tolvte gong på Nordiske Mediedager onsdag kveld. Juryen heidrar prisvinnar Per Anders Todal for allsidigheita hans og den store spennvidda i temaa han tek opp. Samtidig evnar han å gjere kompliserte tema forståeleg på ein fengjande og stilsikker måte, ifølgje juryen.

“Det er en kunst å skrive om tunge og til dels trauste temaer på en leseverdig og engasjerende måte. Årets vinner greier nettopp det – å løfte og gjøre noe spesielt ut av det han skriver om. Som leser blir man gledelig overrasket, man vet aldri hva man får”, skriv juryen i grunngjevinga for tildelinga. 

Det var Mads Ynge Storvik, sjefredaktør og administrerande direktør i NTB, som delte ut språkprisen. 

– Todal er svært produktiv og jobbar under tidspress. Likevel held tekstane hans svært høg kvalitet og tek overraskande vendingar. Det er imponerande! seier Storvik. 

Stolt og audmjuk prisvinnar
– Det er både svært gledeleg og litt merkeleg å bli prislønt for det prosaiske kvardagsstrevet i ei avis, seier prisvinnar Per Anders Todal.

– Eg blir både stolt og audmjuk av å sjå lista over tidlegare vinnarar. Sjølv har eg hatt eit ganske enkelt mål i virket mitt som journalist: Om eg får høve til å skrive sant om viktige ting på ein interessant måte, skal eg vere nøgd. Og dette målet har eg fått strekkje meg etter i over 20 år i Dag og Tid, ei avis som gjev rom for personlege røyster også i nyhendestoffet, med stor fridom for den einskilde journalisten til å forfølgje interessene sine.

Tidlegare prisvinnarar:

2017: Eirin Eikefjord, Bergens Tidende

2016: Håkon Gundersen, Morgenbladet

2015: Redaksjonen i Aftenposten Junior

2014: Truls Dæhli, VG

2013: Trude Lorentzen, Dagbladet

2012: Iver Gjelstenli, Romsdals Budstikke

2011: Kjetil B. Alstadheim, Dagens Næringsliv

2010: Hege Ulstein, Dagsavisen

2009: Hallgeir Opedal, Dagbladet

2008: Kjersti Mjør, Bergens Tidende

2007: Kjetil B. Østli, Aftenposten

Juryen for NTBs språkpris er:

Juryleiar: Therese Manus
Leiar i Norsk kommunikasjonsforening. Ho har vore juryleiar for NTBs språkpris dei siste fem åra.

Jurymedlem: Åse Wetås
Direktør i Språkrådet.

Jurymedlem: Knut Olav Åmås
Direktør i stiftinga Fritt Ord.

Jurymedlem: Christine Calvert
Dagleg leiar i Tekstdoktor.

Jurymedlem: Rune Wikstøl
Språkansvarleg i NTB. Redaktør for NTBs språknorm for mediespråk – også kalla NTB-språket.