Avslag til Brekkefossen kraftverk

NVE gir ikkje løyve til bygging av Brekkefossen kraftverk i Fjaler kommune i Sogn og Fjordane. Søknaden er avslått grunna store konfliktar med landskap og friluftsliv.

Brekkefossen kraftverk var planlagt med inntak 374 moh. og kraftstasjon 245 moh. i vassdraget Storelva som renn ut i Dalsfjorden. Kraftverket var planlagt med ein installert effekt på 5,1 MW og ville gitt ein årleg produksjon på omlag 14,5 GWh.

Dei viktigaste problemstillingane i saka er slik NVE ser det, omsynet til landskap og friluftsliv samt den samla belastninga på synlege fossar i Dalsfjordområdet. Dei fleste høyringspartane er imot utbygging.

NVE meiner at dei negative konsekvensane av tiltaket i hovudsak er knytt til vassdraget sin verdi som eit markert landskapselement i Vassdalen. Brekkefossen ligg i inngangen til eit viktig friluftsområde både lokalt og regionalt. Ei utbygging vil etter NVE sitt syn øydelegge landskapskvalitetane ved å dele fossen i to og plassere inntaket i det mest eksponerte området av fossen slik at dei tekniske inngrepa vil skape svært synlege og varige sår i terrenget. NVE meiner at kraftproduksjon og omsynet til landskap og friluftsliv i dette tilfelle ikkje er sameinte.

Dei negative konsekvensane står etter NVE sitt syn ikkje i forhold til auka kraftproduksjon eller andre positive effektar ved ei utbygging. NVE meiner at den omsøkte utbygginga av vassdraget er i strid med OED sine retningslinjer og ikkje akseptabel i høve til allmenne interesser. På bakgrunn av dette gir NVE ikkje løyve til Brekkefossen kraftverk.

Les meir om Brekkefossen kraftverk på NVEs nettstad.

Kontaktpersonar:
Avdelingsingeniør Siri Merethe Fagerheim, tlf. 22 95 91 75
Seksjonssjef Øystein Grundt, tlf. 22 95 93 89 eller 901 98 216