Konsesjon til ny kraftleidning Rekkedal–Sæbø

NVE gjev konsesjon til å bygge leidningen etter traséalternativ 1. Leidningen vil gå langs søraustlege dalside av Bondalen. NVE gjev òg konsesjon til å byggje ein ny transformatorstasjon på Sæbø. Bakgrunnen for den nye leidningen er at dagens 22 kV-nett ikkje har nok kapasitet for å ta imot all produksjon frå bygda og planlagde småkraftverk ved Hjørundfjorden. NVE meiner ein 132 kV-leidning er den beste løysinga for å auke overføringskapasiteten i området.

Dalsidene i Bondalen er utsett for skred og NVE meiner traséalternativ 1 er akseptabel når det gjeld skredfare. Store delar av traseen går gjennom skog og vil difor gje ulemper for skogressursane, men små verknader for jordbruket. Traseen vil vere godt skjerma frå hovudvegen og bustadane i dalbotnen og gjer etter NVE si vurdering små visuelle verknader. Anlegget kjem ikkje i konflikt med raudlista artar og er ikkje vurdert å gje vesentlege verknadar for naturmangfaldet. Fordelane ved å auke nettkapasiteten for fornybar kraftproduksjon er vurdert som større enn ulempene for miljø- og arealbruksinteressene.

Les meir om kraftleidningen mellom Rekkedal og Sæbø

Kontaktpersonar:
Seksjonssjef Siv Sannem Inderberg, tlf. 90 19 30 08
Sakshandsamar Martin Windju, tlf. 22 95 94 90