Tilråding til Smådøla kraftverk

Kraftverket vil gje ein årleg produksjon på om lag 47,4 GWh noko som tilsvarar straumbruken til rundt 2370 husstandar.

Kraftstasjonen skal byggast i fjell med tunell til inntaksmagasinet.

NVE har lagt vekt på at utbygginga skal skje i eit landskap som allereie er råka av inngrep. Innsjøen Tesse vart regulert for kraftproduksjon på 1940-talet og det er i tillegg både jordbruksverksemd, veger og hytter i området. Det er og av betyding at utbyggar ønskjer å gjere forbetringar av landskapet ved å fjerne eksisterande elektriske strekk og telefonliner.

Den største negative konsekvensen er mindre vatn mellom inntak og utlaup og at dette både vil påverke opplevinga av elva og dei prioriterte naturtypane bekkekløft og fossespøytsonar. Likevel meiner NVE at med dei avbøtande tiltaka vil ulempene som følgje av tiltaket vere akseptable i høve til nytten av auka kraftproduksjon.

NVE anbefaler derfor løyve til bygging av Smådøla kraftverk. Olje- og energidepartementet vil stå for den vidare sakshandsaminga.

Kontaktpersonar
Seksjonssjef Carsten Stig Jensen, tlf. 22 95 92 90
Avdelingsdirektør Rune Flatby, mobil 416 78 203