Løyve til Kvitvella Electrisitetsverk

Valdres Energiverk AS har søkt om løyve til å bygge Kvitvella Electrisitsverk i Kvitvellafossen i Neselva i Fagernes sentrum. Neselva er del av Øystre Slidrevaasdraget. Kraftverket vil få ei installert effekt på 1,4 MW og vil med dei fastsette vilkåra gje ein årleg produksjon på 4,3 GWh.

Kvitvellafossen har tidlegare vore nytta til kraftproduksjon, og i den forbindelse er det allereie etablert ein dam/terskel i den øvste strykstrekninga. Inntaket til kraftverket vert i denne dammen.

Tiltaksområdet ligg i Fagernes sentrum, og er såleis omgjeve av vegar og bygningar. Fossen er eit viktig element i landskapet og har stor inntrykksstyrke ved høge vassføringar. Det er ikkje påvist verdfulle vegetasjons- eller naturtypar innanfor tiltaksområdet. Det er heller ikkje funne raudlista artar som er knytt til elvestrengen eller inntaksområdet. Området frå fossen og ned til utløpet i Strondafjorden er gyte- og oppvekstområde for aure, og fossekall held til langs elva om vinteren og hekkar i tilknytting til fossen.

Det er tidlegare fastsett ei minstevassføring ved Rudi bru lenger opp i elva på 3 m³ /s i perioden 1.5 — 30.9 og 1 m³ /s resten av året, mellom anna av omsyn til fisk og fiske. NVE meiner difor at krav til minstevassføring ikkje kan være lågare enn dette. Perioden med høg minstevassføring er i tillegg utvida til ut oktober av omsyn til gytetilhøva.

NVE meiner at med dei fastsette vilkåra er fordelane større enn skadane og ulempene for allmenne interesser ved å bygge kraftverket og gir difor løyve til Kvitvella Electrisitetsverk.

Meir om Kvitvella:
http://www.nve.no/no/Konsesjoner/Konsesjonssaker/Vannkraft/?soknad=5324&stadium=&type=11

Kontaktpersonar
Seksjonssjef Øystein Grundt, tlf. 22 95 93 89
Avdelingsingeniør Ingri Guren, tlf. 22 95 91 59