Ikkje løyve til opprusting og utviding av Palmafossen kraftverk

Voss Energi AS har søkt NVE om løyve til å ruste opp og utvide Palmafossen kraftverk i Raundalselva i Voss kommune i Hordaland. Dei planla å auke i slukeevna i kraftverket frå 3 m³ /s til 30 m³ /s og installert effekt frå 310 kW til 3,6 MW. Årleg produksjon ville då auke med ca. 14,5 GWh, noko som svarar til straumbruken til omlag 725 husstandar.

Vossovassdraget er både eit nasjonalt laksevassdrag og eit verna vassdrag. Vossolaksen er ein truga storlaksstamme som det er sett inn store ressursar på å redde. Oppstraums Palmafossen er det 7-8 km egna gytestrekning, og det er i dei seinare åra registrert naturleg rekruttering av laks oppstraums fossen, noko som tyder på at laksetrappa verkar. Det vert òg sett ut ein del fisk frå Voss klekkeri. Elvestrekninga oppstraums Palmafossen kan difor verte viktig i arbeidet med å byggje opp igjen laksestammen i Vosso.

Tiltaket vil medføre sterkt redusert vassføring og endra straumforhold i og ved Palmafossen. NVE meiner tiltaket vil gje betydelege negative verknader for fisk. Landskap knytt til fossen vil òg kunne verte noko påverka. Vi kan ikkje sjå at avbøtande tiltak vil redusere skadeverknadene for ålmenne interesser, særleg laks, til eit nivå som etter vårt syn vil vere akseptabelt.

NVE meiner at tiltaket vil gjere forholda i vassdraget miljømessig dårlegare og det strid difor mot vassdragsvernet. Tiltaket vil òg vere i konflikt med gjeldande beskyttelsesregime for laks i nasjonale laksevassdrag. Skadane og ulempene som vert påført dei ålmenne interessene er større enn fordelane ved opprusting og utviding av kraftverket. Krava i vassressurslova er difor ikkje oppfylt. Grunna dette er søknaden avslått.

Les meir om Palmafossen kraftverk  

Kontaktpersonar:

Avdelingsingeniør Kirsten Marthinsen, tlf 22 95 92 34
Seksjonssjef Øystein Grundt, tlf. 22 95 93 89, mobil 901 98 216