Løyve til Kinnforsen kraftverk

Kinnforsen kraftverk vil nytte eit fall på 158 meter i Krokvasselva. Kraftverket vert bygd med ein inntaksdam og røyrgata skal gravast ned fram til kraftstasjonen. Det vil bli bygd veg fram til inntaket til kraftverket.

Kinnforsen er eit særprega element i landskapet og viktig for grottedannande prosessar. Området for kraftverksutbygginga ligg i nærleiken av eit felt med gamalskog med høg botanisk artsrikdom. For å ta vare på gamalskogsområdet i størst mogleg grad har NVE sett krav om at kraftstasjonen vert flytta noko i høve til kva som fyrst var omsøkt. Kraftverket vil ligge i eit område med reindrift, men slik tiltaket er utforma vil reindrifta ikkje verte monaleg forstyrra dersom det vert teke omsyn i anleggstida. 

NVE har sett krav om ei minstevassføring som skal ivareta noko av Kinnforsen sitt særpreg som landskapselement. Særleg har vi lagt vekt på minstevassføring i sommartida, medan i vintersesongen er den satt noko lågare. Elva er likevel sikra ei vassføring som ivaretek omsynet til vasstilknytta liv i og langs elva.

Med dei fastsette vilkåra meiner NVE at fordelane gjennom ei auke i fornybar energiproduksjon på 8,7 GWh er større enn skader og ulemper for dei allmenne interessene som vert råka. NVE gjev difor løyve til Kinnforsen kraftverk på fastsette vilkår.

Meir informasjon på www.nve.no/konsesjonsnyheter  

Kontaktpersonar:
Seksjonssjef Øystein Grundt, tlf. 22 95 93 89 / 90 19 82 16
Avdelingsingeniør Kirsten Marthinsen, tlf. 22 95 92 34