Løyve til Mjølsvik kraftverk

Kraftverket vil nytte eit fall på omlag 380 meter i Mjølsvikelva og vil føre til at ei elvestrekning på ca. 1,9 kilometer vil få redusert vassføring. Driftsvassvegen vil bli rundt 1800 meter lang. Dei øvste 175 metrane skal klamrast til fjell og tildekkast, medan resten av røyrgatetraseen skal gravast ned. Det er gjeve løyve til å bygge ein 1100 meter lang veg opp til inntaket og ein 700 meter lang veg frem til kraftstasjonen.

Det er påvist fossesprøytsonar ved Øvre og Nedre Mjølsvikfossane. Av omsyn til biologisk mangfald har NVE fastsett ei minstevassføring frå inntaket på 200 l/s i perioden 1. mai til 30. september, og 70 l/s resten av året. Nedre del av Mjølsvikelva er anadrom med oppgang av sjøaure og det er difor sett vilkår om installasjon av omlaupsventil.

NVE vurderer utbygginga med fastsett minstevassføring, og krav om installasjon av omlaupsventil til å vere akseptabel i høve til allmenne og private interesser.

Kontaktpersonar:
Seksjonssjef Øystein Grundt, tlf. 22 95 93 89/901 98 216
Avdelingsingeniør Ellen Lian Halten, tlf. 72 89 65 64