Konsesjon til kraftleidning mellom Sunnmøre og Sogn

Den nye kraftleidningen går frå Ørskog transformatorstasjon via transformatorstasjonar i Ørsta, Ålfoten, Moskog og Høyanger til ein ny transformatorstasjon i Sogndal. Kraftleidningen er omlag 280 km lang og vil gå gjennom 15 kommunar og 2 fylke.

- Løysinga inneber riving og kabling av eksisterande kraftleidningar, og legg til rette for bygging av ny fornybar energi og omstrukturering og ytterlegare riving av eksisterande kraftleidningar i framtida. Dette tek omsyn til miljø, estetikk og lokalsamfunn på ein god måte og er i tråd  med den nyleg vedtekne kraftleidningsstrategien til staten, seier Agnar Aas.

Viktig for forsyningstryggleiken
420 kV leidningen mellom Ørskog og Sogndal er viktig for å styrke forsyningstryggleiken i Midt-Noreg og særleg Møre og Romsdal. Området er i dag eit underskotsområde og vil i dei næraste åra ha aukande kraftunderskot. Dagens kraftnett inn mot regionen er ikkje tilpassa det forbruket som Midt-Noreg vil ha framover. Etter NVE sitt syn er ein ny 420 kV leidning mellom Ørskog og Sogndal det tiltaket som er mest robust i høve til framtidige endringar av produksjon og forbruk.

Moderate miljøverknader
Gjennom konsesjonsprosessen er det gjort ei rekke traséjusteringar som saman med vilkår om riving og kamuflerande tiltak, reduserer dei visuelle verknadene betydeleg. Den nye 420 kV leidningen vert i hovudsak bygd med portalmaster i stål, matte liner og fargelause glasisolatorar. NVE set vilkår om kamuflerande tiltak med malte mastar og komposittisolatorar på omlag 1/3 av strekninga. Det vil redusere den visuelle verknaden av kraftleidningen i landskapet.

Kraftleidningstraséen følgjer i hovudsak eksisterande infrastruktur, og relativt små inngrepsfrie naturområde vert råka. Inga område verna etter naturvernlova eller plan- og bygningslova eller kjente freda kulturminne vert råka av traséen. Leidningen vil krysse fem verna vassdrag, men vurderast ikkje vesentleg å påverke dei verdiane som vart lagt til grunn for vernet.

Kabel er ikkje omsøkt
Mange høyringsinstansar har i konsesjonsprosessen ønska sjø- og jordkabel over heile eller delar av strekninga. Ei kabelløysing på lengre eller kortare strekningar vil kosta om lag seks til ti gongar så mykje som ein luftleidning.
- Ved val av sjøkabel på heile strekninga vil det ikkje bli transformeringspunkt mellom Ørskog og Sogndal transformatorstasjonar. Dermed mister ein sjansen til å sanere gamle leidningar og byggje ut ny fornybar produksjon, seier Aas.
Ut frå gjeldande kabelpolitikk, høge kostnader og omsynet til likebehandling av saker, har NVE derfor ikkje funne grunnlag for å be Statnett søkje om kabel på strekninga.

Les faktaark om konsesjonen på www.nve.no

Kontaktpersonar
Vassdrags- og energidirektør Agnar Aas, mobil 951 79 164
Avdelingsdirektør Rune Flatby, mobil 416 78 203
Seksjonssjef Tormod Eggan, mobil 915 25 034