Sagtjønna Energiverk AS har søkt NVE om løyve til å byggje Sagtjønna kraftverk i Åfjord kommune. Kraftverket ville om det vart bygd nytte eit fall på 257 meter og gje ein årleg produksjon på omlag 0,45 GWh, noko som svarar til straumbruken til rundt 23 husstandar.

Det er også søkt om å regulere Sagtjønna med 3 meter , som er naudsynt for å gje produksjonsgrunnlag i kraftverket. Den planlagde reguleringa vil etter NVE sitt syn bety negative verknader for området som landskapselement og medføre ulemper for friluftslivet. Vidare vil den lokale stammen av bekkeaure stå i fare for skade. NVE vektlegger også at regulering av Sagtjønna på vinterstid vil gje negative følgjer for reindriftsnæringa grunna utrygge isforhold og mogleg tap av trekklei.

I den samla vurderinga legg NVE vekt på at reguleringa av Sagtjønna inneber eit uforholdsmessig stort inngrep sett i forhald til den avgrensa kraftmengda som vil bli produsert. NVE meiner derfor at fordelane ved bygging av Sagtjønna mikrokraftverk er mindre enn ulempene for ålmenne interesser, og kravet i vassressurslova § 25 er då ikkje oppfylt. På denne bakgrunnen er søknaden avslått.

Les meir om avslaget på www.nve.no .

Kontaktpersonar
Seksjonssjef Øystein Grundt, tlf. 22 95 93 89/90 19 82 16
Avdelingsingeniør Tale Helen Seldal, tlf. 22 95 94 51