Løyve til å bygge Syversætre foss kraftverk

Kraftverket vil unytte eit fall på om lag 7 meter i Syversætre foss i Flisaelva. Inntaket vert på toppen av fossen, medan utlaupet frå stasjonen kjem rett nedanfor. Kraftverket vert bygd som ein del av dammen. Ovanfor fossen vert det demt ned eit areal på om lag 26 dekar over ein strekning på rundt 750 meter.

NVE meiner at den største verknaden som følgje av tiltaket kan vere påverknad på aure som vandrar opp fossen. Det er difor sett krav om at det skal byggjast ein fiskepassasje med minstevassføring heile året. Mest vatn skal sleppast i perioden august til oktober (1 m3/s) som er den viktigaste vandringsperioden for aure. I denne perioden kan fylkesmannen dessutan sette krav om kortvarig auke i minstevassføringa for å stimulere fisken til vandring. I mai til juli skal det sleppast 750 l/s, medan det resten av året er sett krav om ei minstevassføring på 250 l/s.

I høve til andre allmenne interesser vurderer NVE verknadene for ålmenta som små.
Det er vidare lagt vekt på at arealbruken tilnyta dei tekniske inngrepa er avgrensa, og alle inngrepa skal gjerast med varsemd. NVE vil sjå til at dette vert ivareteke gjennom godkjenning av detaljplanar for anlegget og oppfølging i byggetida.

NVE vurderer utbygginga med dei fastsette avbøtande tiltaka til å vere akseptabel i høve til allmenne og private interesser.

For meir informasjon, kontakt:
Seksjonssjef Øystein Grundt, tlf. 22 95 93 89, mob. 901 98 216
Overingeniør Ingrid Haug, tlf. 22 95 94 16